Aadhunik Bhojpuri Vyakaran / आधुनिक भोजपुरी व्याकरण

आपन बात

‘आधुनिक भोजपुरी व्याकरण’ रउवा सभे के हाथ में बा। एकरा पर तरह-तरह के सुझाव आइल। हमनी के प्रयास भइल बा कि ओह सब जरूरत के एह में शामिल कइल जाव। बिहार में भोजपुरी के पढ़ाई छउवा क्लास से लेके बारहवाँ आ उत्तर प्रदेश नेपाल में प्राथमिक स्तर पर हो रहल बा। बाबा साहब भीमराव अंबेडकर बिहार विश्‍वविद्यालय, मुजफ्फरपुर आ वीर कुंवर सिंह विश्‍वविद्यालय, आरा में स्‍नातकोत्तर स्तर पर एकर पढ़ाई हो रहल बा। जवाहरलाल नेहरू विश्‍वविद्यालय, नयी दिल्ली में स्‍नातकोत्तर हिन्दी में एगो ऐच्छिक पत्र के रूप में एकर स्वीकृति मिलल हवे।
ई व्याकरण छात्र लोग के ध्यान में राख के लिखाइल बा। आज बिहार में छउवाँ से लेके स्‍नातकोत्तर स्तर ले भोजपुरी के पढ़ाई हो रहल बा। हमनी बिहार सरकार के भोजपुरी पाठ्‍यक्रम निर्माण समिति में रहनी। हमनी के बुझाइल जे छात्रन खातिर एगो अलगे व्याकरण के जरूरत बा। पाठ्‍यक्रम बनावे के क्रम में एह व्याकरण के बहुते हिस्सा लिखाईल बा।
अब पाठ्‍यक्रम में प्रयोजनमूलक भाषा पढ़े के बा। हमनी के विचार रहे जे एह में प्रयोजनमूलक भोजपुरी से सम्बन्धित सामग्री भी दिहल जाव। सामग्री भी तैयार हो गइल बाकिर बाद में अइसन करे के विचार छोड़ दियाइल। असल में अइसे कइला से ई किताब बहुते मोटा हो जाइत। अब अलग से प्रयोजनमूलक भोजपुरी आ भोजपुरी रचना के किताब निकालल जाई।
भोजपुरी भाषा-साहित्य के हितचिंतक विधायक अजीत कुमार सिंह, राँची विश्‍वविद्यालय (झारखंड) के सेवानिवृत्त प्रोफेसर बालेंदुशेखर तिवारी आ लीडेन विश्‍वविद्यालय (नीदरलैंड) के हिन्दी विभागाध्यक्ष प्रो. अभिषेक अवतंस के हमनी आभारी बानी, जे अपना कीमती समय में से कुछ समय निकाल के हमनी के मार्गदर्शन कइल।

–महामाया प्रसाद विनोद, जीतेन्द्र वर्मा